സ്വന്തമായി അയൺ ഡോം നിർമ്മിക്കാനൊരുങ്ങി ഇന്ത്യയും. 350 കിലോമീറ്റർ ദൂരപരിധിയുള്ള തദ്ദേശീയ ലോംഗ് റേഞ്ച് സർഫേസ് ടു എയർ മിസൈൽ (എൽആർഎസ്എഎം) ആണ് ഇന്ത്യ നിര്മ്മിക്കാനൊരുങ്ങുന്നതായാണ് പുതിയ റിപ്പോര്ട്ടുകള്. ആകാശത്ത് നിന്ന് വരുന്ന റോക്കറ്റുകളെ വായുവില് തന്നെ നശിപ്പിക്കുന്ന മിസൈല് സംവിധാനമാണ് അയണ് ഡോം. ഈ നൂതന സംവിധാനം 350 കിലോമീറ്റര് വരെ ശ്രദ്ധേയമായ ദൂരത്തില് ഇന്കമിംഗ് സ്റ്റെല്ത്ത് ഫൈറ്ററുകള്, വിമാനങ്ങള്, ഡ്രോണുകള്, ക്രൂയിസ് മിസൈലുകള്, പ്രിസിഷന് ഗൈഡഡ് യുദ്ധോപകരണങ്ങള് എന്നിവ കണ്ടെത്തുന്നതിന് മാത്രമല്ല, ഇല്ലാതാക്കാനും രൂപകല്പ്പന ചെയ്തിട്ടുള്ളതാണ്.
ഇന്ത്യൻ വ്യോമ പ്രതിരോധ സംവിധാനം റഷ്യയുടെ എസ്-400 എയർ ഡിഫൻസ് സിസ്റ്റം അല്ലെങ്കിൽ ഇസ്രായേലിന്റെ അയൺ ഡോം പോലെയായിരിക്കുമെന്നാണ് റിപ്പോര്ട്ടുകള്. എസ്-400 സംവിധാനത്തിന്റെ മൂന്ന് സ്ക്വാഡ്രണുകളാണ് ഇന്ത്യയിലുള്ളത്. ചൈന, പാകിസ്ഥാൻ അതിർത്തികളിൽ ഇവ വിന്യസിച്ചിട്ടുണ്ട്. രണ്ട് സ്ക്വാഡ്രണുകൾ കൂടി ഇന്ത്യയിൽ എത്തുമെങ്കിലും അവയുടെ തീയതി ഇതുവരെ തീരുമാനിച്ചിട്ടില്ല.
ഈ മിസൈല് സംവിധാനത്തിന് ഉപരിതലത്തില് നിന്ന് വായുവിലേക്ക് ആക്രമണം നടത്താന് കഴിയും. ഇത് മൂന്ന് പാളികളായിരിക്കും. അതിനര്ത്ഥം ഇതിന് മൂന്ന് ഘട്ടങ്ങളുണ്ട്. ശത്രുവിമാനങ്ങള്, യുദ്ധവിമാനങ്ങള്, റോക്കറ്റുകള്, ഹെലികോപ്റ്ററുകള് അല്ലെങ്കില് മിസൈലുകള് എന്നിവയെ 400 കിലോമീറ്റര് പരിധിക്കുള്ളില് വെടിവയ്ക്കാന് ഇതിന് കഴിയും. ഡിആര്ഡിഒയുടെ പ്രോജക്ട് കുഷയ്ക്ക് കീഴില് വികസിപ്പിച്ചെടുത്ത ഈ തദ്ദേശീയ ലോംഗ് റേഞ്ച് സര്ഫസ് ടു എയര് മിസൈല് (എല്ആര്-എസ്എഎം) സംവിധാനത്തിന്റെ ‘തടസ്സപ്പെടുത്തല് ശേഷി’ റഷ്യന് എസ്-400 ട്രയംഫ് വ്യോമ പ്രതിരോധത്തിന് തുല്യമാകുമെന്നുമാണ് റിപ്പോര്ട്ടുകള്. ഇതിനുമുമ്പ് ഇന്ത്യ ഇസ്രായേലുമായി ചേര്ന്ന് ഇടത്തരം ദൂരത്തിലുള്ള സാം മിസൈല് നിര്മിച്ചിരുന്നു. അതിന്റെ പരിധി 70 കിലോമീറ്ററാണ്.
ഇന്ത്യയില് ഡിആര്ഡിഒ ഭൂമിയില് നിന്ന് വിക്ഷേപിക്കുന്നതും യുദ്ധക്കപ്പലില് നിന്ന് വിക്ഷേപിക്കുന്നതുമായ വ്യോമ പ്രതിരോധ മിസൈലുകള് വികസിപ്പിച്ചെടുത്തിട്ടുണ്ട്. ഇതില് ഏറെ പുരോഗതിയും ഉണ്ടായിട്ടുണ്ട്. ഇന്ത്യയുടെ മൂന്ന് സേനകള്ക്കും നിലവില് മധ്യദൂര ഉപരിതല- ആകാശ മിസൈലുകള് (MRSAM) ഉണ്ട്. റഷ്യയുടെ എസ്-400-ന് സമാനമായി ചൈനയ്ക്ക് സ്വന്തമായി വ്യോമ പ്രതിരോധ സംവിധാനമുണ്ടെങ്കിലും റഷ്യയുടെ എസ്-400 വ്യോമ പ്രതിരോധ സംവിധാനത്തേക്കാള് ശേഷി കുറവാണ്. ഇന്ത്യന് എയര് ഡിഫന്സ് സിസ്റ്റം (എല്ആര്എസ്എഎം) പദ്ധതിക്ക് നേതൃത്വം നല്കുന്നത് ഇന്ത്യന് വ്യോമസേനയാണ്.
Discussion about this post