ബെംഗളൂരു: വയനാട്ടിൽ നിരോധിത ഭീകര സംഘടനയായ പോപ്പുലർ ഫ്രണ്ടിന്റെ പിന്തുണ പോലും കോൺഗ്രസ് തേടിയെന്ന് പ്രധാനമന്ത്രി നരേന്ദ്ര മോദി. കോവിഡ് വാക്സിൻ മുതൽ ഇവിഎം മെഷീനുകളെ വരെ ചോദ്യം ചെയ്ത കോൺഗ്രസ് രാജ്യത്ത് അപകീർത്തിപ്പെടുത്തുകയാണെന്നും പ്രധാനമന്ത്രി പറഞ്ഞു. സുപ്രീംകോടതി പോലും ഇക്കാര്യത്തിൽ കോൺഗ്രസിനെ ശാസിച്ചിരുന്നു. ആരുടെ ആവശ്യപ്രകാരമാണ് കോൺഗ്രസ് ഇപ്രകാരം ചെയ്യുന്നതെന്നും അദ്ദേഹം ചോദിച്ചു. കർണാടകയിലെ ബെലഗാവിൽ തിരഞ്ഞെടുപ്പ് റാലിയിൽ സംസാരിക്കവേയായിരുന്നു പ്രധാനമന്ത്രിയുടെ പ്രതികരണം.
രാജ്യത്തെ ജനങ്ങളുടെ സ്വത്തിന്റെയും സമ്പത്തിന്റെയും പൊന്നിന്റെയും എന്തിനേറെ താലിമാലയുടെ എക്സ്-റേ വരെ കോൺഗ്രസെടുക്കുമെന്നും. എന്നിട്ട് ഇവയെല്ലാം അവരുടെ പ്രിയപ്പെട്ട വോട്ടർമാർക്ക് വീണ്ടും വിതരണം ചെയ്യുമെന്നും പ്രധാനമന്ത്രി വിമർശിച്ചു. ഇവിഎം മെഷീനുകളെ കുറിച്ച് പറഞ്ഞു പരത്തുന്ന വ്യാജ പ്രചരണങ്ങൾ രാജ്യത്തിൻറെ ജനാധിപത്യത്തിന് തന്നെ അപമാനമാണ്. കോൺഗ്രസ് ഇതിന് ജനാധിപത്യ വിശ്വാസികളോട് മാപ്പ് പറയണമെന്നും പ്രധാനമന്ത്രി കൂട്ടിച്ചേർത്തു.
Discussion about this post