രണ്ട് ദിവസത്തെ റഷ്യ സന്ദർശനത്തിനായി പ്രധാനമന്ത്രി നരേന്ദ്ര മോദി മോസ്കോയിലേക്ക് പുറപ്പെട്ടു. പ്രസിഡൻ്റ് വ്ളാഡിമിർ പുടിനെ കാണുകയും വിവിധ വിഷയങ്ങളിൽ ചർച്ച നടത്തുകയും ചെയ്യും. അഞ്ച് വർഷത്തിനിടെ പ്രധാനമന്ത്രി മോദിയുടെ ആദ്യ റഷ്യ സന്ദർശനമാണിത്. മോസ്കോയിലെ തൻ്റെ ലക്ഷ്യങ്ങൾ പൂർത്തിയാക്കിയ ശേഷം ജൂലൈ 9, 10 തീയതികളിൽ അദ്ദേഹം ഓസ്ട്രിയയിലേക്ക് പോകും.
പ്രധാനമന്ത്രി നരേന്ദ്രമോദി ആദ്യമായാണ് ഓസ്ട്രിയ സന്ദർശിക്കുന്നത്. 1983 ൽ ഇന്ദിരാഗാന്ധിക്ക് ശേഷം 41 വർഷത്തിന് ശേഷമാണ് ഒരു ഇന്ത്യൻ പ്രധാനമന്ത്രി ഓസ്ട്രിയ സന്ദർശിക്കുന്നത്. തൻ്റെ വരാനിരിക്കുന്ന റഷ്യയിലെയും ഓസ്ട്രിയയിലെയും സന്ദർശനങ്ങൾ ഇരു രാജ്യങ്ങളും തമ്മിലുള്ള ബന്ധം മെച്ചപ്പെടുത്തുന്നതിന് ഇന്ത്യക്ക് അവസരമൊരുക്കുമെന്ന് പ്രധാനമന്ത്രി മോദി പുറപ്പെടുന്നതിന് മുമ്പ് പറഞ്ഞു.
ഇരുരാജ്യങ്ങളുമായി ഇന്ത്യയ്ക്കുള്ളത് കാലത്തിന് അതീതമായ സൗഹൃദമാണ്. ഈ രാജ്യങ്ങളിൽ താമസിക്കുന്ന ഇന്ത്യൻ സമൂഹവുമായി ആശയവിനിമയം നടത്താൻ താൻ ആഗ്രഹിക്കുന്നുവെന്നും പ്രധാനമന്ത്രി പറഞ്ഞു.ഊർജം, സുരക്ഷ, വ്യാപാരം, നിക്ഷേപം, ആരോഗ്യം, വിദ്യാഭ്യാസം, സംസ്കാരം തുടങ്ങിയ മേഖലകളിൽ ഇന്ത്യയും റഷ്യയും തമ്മിലുള്ള സവിശേഷവും പ്രത്യേകവുമായ തന്ത്രപരമായ പങ്കാളിത്തം കഴിഞ്ഞ പത്ത് വർഷമായി പുരോഗമിച്ചുവെന്ന് പ്രധാനമന്ത്രി പറഞ്ഞു.
വ്ളാഡിമിർ പുടിൻ ഇന്ന് നരേന്ദ്ര മോദിക്ക് അത്താഴ വിരുന്ന് നൽകും. 22ാമത് ഇന്ത്യ-റഷ്യ വാർഷിക ഉച്ചകോടിയിൽ പങ്കെടുക്കുന്നതിന് വേണ്ടി പ്രസിഡന്റ് വ്ളാഡിമിർ പുടിന്റെ പ്രത്യേക ക്ഷണപ്രകാരമാണ് പ്രധാനമന്ത്രി ഇന്ന് റഷ്യയിലേക്ക് തിരിച്ചത്. ഇരുനേതാക്കളും സമകാലിക, ആഗോള, പ്രാദേശിക വിഷയങ്ങൾ കാഴ്ചപ്പാടുകൾ കൈമാറുമെന്ന് വിദേശകാര്യമന്ത്രാലയം പുറത്ത് വിട്ട പ്രസ്താവനയിൽ പറയുന്നു.
Discussion about this post